احباط تحت الباط

النهاردة وصلتني رسالة على الموبايل بتقول أن مستشفى دار الفؤاد هتعمل امتحان النيابة بتاعتها يوم الجمعة 8 يوليو الساعة 3 العصر .. طب ده يبقى اسمه ايه .. ثورة مضادة ده  ولا امتحان الفلول !!؟؟

كده كده أصلا ماكنتش هنزل يوم 8 يوليو عشان عندي شغل .. أكل العيش مر .. كان واحد بيسأل على تويتر اذا كانت ال648 جنيه حد أدنى للأجور خطوة للامام نحو أهداف الثورة ولا خطوة للخلف .. أنا شايف انها خطوة للامام خصوصا أن مرتبي بالحوافز بيوصل 400 جنيه بالعافية مقابل 35 ساعة عمل اسبوعيا .. باقي دخلي الشهري مصدره العمل الخاص وبتكون النتيجة اني بشتغل تقريبا 120 ساعة اسبوعيا عشان أحاول أوصل ل1500 جنيه.

لو ثور بيلف في ساقية مش هيشتغل عدد الساعات دي.

اسوأ حاجة ممكن تحصل للواحد انه يبقى مشغول بأكل عيشه .. مش بيبقى واخد باله من اللي بيحصل حواليه .. مش بيلحق يستمتع بحياته .. ولا بيقدر يفكر ازاي يخلي حياته تبقى أحسن .. بيبقى همه كله أن اليوم يعدي .. مكنتش أتخيل اني هبقى كده .. أنا زعلان من نفسي وعلى نفسي .. بس مسيرها تروق و تحلى.