مسيرة المعادي 25 يناير 2012

من المعادي للتحرير .. يسقط يسقط المشير

ده كان هتاف المسيرة اللي طلعت من قدام جامع الفتح في المعادي النهاردة الساعة 11 .. مشينا في شارع 9 و دخلنا شارع حسنين دسوقي لاخره ومشينا في شارع احمد زكي لحد ميدان سوارس و عدينا الكوبري الناحية التانية عشان نضم على المسيرة التانية في ميدان الحرية

كان في علم مصر كبير مكتوب عليه "قالوا فرحة و قالوا عيد - واحنا قلنا حق الشهيد" كان في ناس من 6 ابريل و ناس من الاشتراكيين الثوريين لكن معظم الناس ملهاش علاقة بتنظيم معين

مشينا بعد كده في شارع 105 لميدان الاتحاد و بعدين دخلنا طريق مصر حلوان الزراعي لحد اخر سور مستشفى المعادي للقوات المسلحة بعد كده مشينا مع السور عشان نطلع على الكورنيش من جنب المحكمة الدستورية

كان في علم احمر كبير مكتوب عليه يسقط حكم العسكر بيتقدم المسيرة و علم تاني كبير لمصر وتحته علم كوبا عليه صورة جيفارا

بعد كده مشينا على الكورنيش وكان في تجاوب رائع من العربيات اللي ماشية جنبنا .. محدش كان متضاايق اننا واخدين نص الطريق بعددنا .. المسيرة كانت ضخمة و طويلة ... معرفش العدد كام لاني ممعرفش اخرها فين لكن لما كنا فوق كوبري النيل بدراوي كنت شايف اخرنا على بعد كيلو على الاقل

كملنا المسيرة على كورنيش مصر القديمة و المنيل لحد سور مجري العيون هناك وقفنا 10 دقائق نستريح و نستنى الناس اللي اتأخرت ورا

دخلنا شارع القصر العيني و كان العدد ضخم جدا .. هتافاتنا كانت بترج الشارع .. وصلنا للقصر العيني الفرنساوي وهناك انضمت لينا مسيرة حلوان وطلعنا احنا الاتنين على الكورنيش عشان نروح التحرير .. العدد ساعتها ماكنش له حصر والحماس مالوش حدود

وصلنا لفندق سميراميس قبل كوبري قصر النيل وهناك وقفنا ومقدرناش ندخل التحرير عشان كان مليان على اخره بعد ساعة تقريبا دخلت انا ولقيت علم جيفارا و علم يسقط حم العسكر وصلوا الميدان جوة

مسيرة اخدت 5 ساعات تقريبا مشينا 30 كيلو لحد ماوصلنا التحرير .. مقدرتش اقعد كتير في الميدان لاني كنت تعبت جدا .. اخدت المترو و رجعت .. وهنزل تاني لما العدد يقل شوية .. هنزل اشارك في مسيرات مش هنقعد في التحرير ونقفل على نفسنا زي الأول

الثورة مستمرة

في صور تانية نظيفة هنا